---

مِشْ سَهِل الخيام

ولا سهلة هالفِرقة

لا السهل بينام

ولا الغصّة والحرقة

مش سهل بُعدِك يا زنبقة تشرين

مش سهل وَعدِك يا حلوة الحلوين

يا سهل صعب للعدا ما بتلين

مش سهل الدمع والعين محترقة...

يا نجمة السهرات للحارة شو اشتقنا

للتين والزيتون ولهفة مفارقنا

للنبع والرمّان والشوك والكينا

لغَمرة العزّ تِحيي ليالينا

يا جوهرة معتّقة بغبرة سنينا

بالبعد يا خيام عنّك عتقنا...

سرّ الهوى فيكي عَ عتابِك مخبّى

فيكي القلب متروك عَ حبّك تربّى

فيكي النظر سارح

يا بكرا ومبارح

فيكي العشق جارح

يا ديار منحبّا...

مش سهل سهلك ميدان الأسود

يا قلعة العزّ يا حُصن الصمود

يا بُرعم بنيسان

يا زهرة الأوطان

مش قطعة من لبنان

إنتِ الوطن عنوان

إنتِ وطن ووجود...

الشاعرة هبة خريس