اعزائي القيمين على الموقع

لدي اقتراح بسيط ارجو دراسته: ان يتم انشاء زاوية صغيرة في الموقع لنشر المقالات الساخرةوبالتأكيد من دون تجاوز الاداب العامة.

ولدي نموذج عن هذه المقالات:

انا شب و عم اسس حالي...

اكيد هيدا الفنان يلي غناها ما قاصد لا من قريب ولا من بعيد يأسس حالو بلبنان !!

ليش ؟

تعا إلك ليش :

مثلاً حضرة جنابي فوتوني اهلي بكير على المدرسة يعني على ال ٣ سنين مش لاني انا كنت شيطان و بدن يتخلصو مني، لا ابداً .

قال هيك افضل بتخلص ابكر، مهم انا السنة بتخرج ( طبعاً اذا ما طرقونا جبهة النصرة،

او طبشوا سنيّ شيعي ،

او مزحت معنا اسرائيل متل ال ٢٠٠٦ )...

بتخرج بعد ١٩ سنة ِعلم..

تعا روح دور على شغل.. ولاني بلبنان و شو ما كان اختصاصي ، رح اشتغل بمحل تياب او صبابيت او ايا شحار و تعتير .

مش لان انا ما بدي اشتغل بوظيفتي بس لان لازم اشتغل اي شي حتى امن حالي ...

جينا شتغلنا و قول قبضت ١٠٠٠ $ بالشهر هيدا اكيد حلم بس عم عيشك اللحظة معي ...

في حال فكرت تشتري سيارة

انسى موضوع الزواج بغض النظر عن انو بطل معك مصاري، رح تحبا للسيارة اكتر من ايا حدا لانا بتكون حارقة سلافك قسوطات للبنك ...

وتعا روح شتري بيت هون النكبة يا معلم ، اي اذا بدك تشتري بيت و بوج حرقوص و بما انو بوج حرقوص رح تعرف اسامي اميات شوفرية الفانات و حتى الزمامير رح تحفظها ... مثلا بتكون نايم بتسمع زمور بتقول هاي دلوعة حمودي ابن نهاد الرقاصة خبرة بتصير يعني يا معلم ...

و لا بيكون سعر الشقة شي ٢٥٠ الف دولار يعني اذا بدك تقسطها بيكيف فيها حفيدك والله جدو ورثو بيت جديد...

و اذا على معاشك مع عملية حسابية صغيرة فيك تجيبو للبيت كاش بي شي ٢٠ سنة و ٨ شهور طبعاً لازم تقعد بلا اكل و تروح و تجي مشي على الشغل ، و نفس التياب ، و تنام تحت الجسر و تموت جوع ...

بس مهم صار عندك بيت بلبنان والله انك اسطورة بهل جيل بتكون...

اما النكبة الكبرى تعا روح طلوب ايد حبيبتك والله يا ما اهونها نكبة فلسطين . بيطلعلك بيا بعد تحقيق شي ساعة و يدور حول فكرة انو لازم تعيشها متل ما انا معيشها و هو بيكون شوفير تكسي على مرسيدس قطش ...

و بيجي بيطبشك هيداك الطلب بدي مقدما ٥٠ الف و ماخرا ١٠٠ ...

العمى بيقلبك ليييي شو وجها بيطل على البحر ومن ورا على جبل الشيخ ؟؟؟؟

و بعد كل هيدا بدك تقنعني انو قصدو ياسس حالو بلبنان؟!!! ...

و بيسالوك ليش عم تهاجر و تترك بلدك ؟

او ليش عم تحكي عنو بالعاطل ؟؟

انا مش عم احكي على بلدي لان بكرهو ، والله عم احكي على بلدي من حرقت قلبي عليّ ..

لان لو نحنا حطينا كلنا ايدينا سوا بنعيش بجنة سوا وبنأمن حياتنا و حياة ولادنا سوا ، و يا بنموت بكرامي كلنا سوا...

كرامتنا نحنا مش كرامة الزعما تعولنا ، يلي بنمشي وراهن و مغمضين عيونا...

أرحمونا الارض عم تدعي عليكم .

ملاحظة : المقالة من تاليف علي غصن

--------------- -------------

إدارة الموقع ستأخذ الإقتراح بجديّة وهذا يبقى رهن بكمية الكتابات التي تردنا والتي يمكن تصنيفها للنشر في تلك الزاوية المقترحة.