إنتِ القمر؟ والقمر يا نيّالو

شفتها.. كثير.. كثير حلوي .. حاملي بإيدها والحلوين حرام بإيديهم يحملوا.

نظرتها كثير حزيني.. كإنها حاملي هموم الدني... ما بتعرف إنّو الجمال

مالك الدنيا والبشر.. ولولا الجمال كان الزمن سكّر بواب الكون... وهجر.

                الملاك الحزين

حرام يا حلوي تحملي من الوزن كيلو         بيرمي تاجو الملك قدّامك لمّا تندهيلو

نظرة عيونك بتخلّي العمر فرحان         وبيشفى قلب المريض المحتاج ميلو

لا تقسي عالمراية ..وتوقفي قبالها         بيغار قزازها لمّا خيالك لحالك بيوميلو

وقدّيش بيشتاق المشط تا يملّس الشعرات         لمّا الشعرات بدلال مع نسمات الهوا يميلو

وهالكون الحزين لمّا أخذتِ كل الجمال         حرام عليكِ إذا أخذتِ الجمال شو تركتيلو؟

في جمال بهالدني بس مثلك ما لقيت         الليل بيغار منّك مثل غيرة زميلو

وزميلو نهار الشمس بتنوّر طرافو         إنتِ مين؟ إنتِ القمر؟ والقمر يا نيّالو

بيحسّك نجوم عم ترقص فرحاني بالسما         وإذا غبتي يمكن كل نجوم السما بتطفيلو

رجعي..حرام تتركي الشاعر حزين         على بعدك يمكن شيطان شِعرو تهجريلو